- Cwcis sydd wir eu hangen
Cwcis sydd wir eu hangen
Mae rhai o’n cwcis yn hanfodol ac ni fydd rhannau o’r safle’n gweithio hebddynt. Mae hyn yn cynnwys cofnodi eich dewisiadau cadw cwcis.
24 Tach 2023
Fis Rhagfyr eleni, bydd Trafnidiaeth Cymru yn darparu gwasanaethau a threnau ychwanegol ar draws gogledd a de Cymru ac i Loegr.
Gyda’r amserlen nesaf yn rhedeg o 10 Rhagfyr tan 1 Mehefin y flwyddyn nesaf, mae cynlluniau cyffrous i bron i ddyblu nifer y gwasanaethau ar reilffordd Glynebwy diolch i fuddsoddiad o £70 miliwn.
Bydd gwasanaethau newydd sbon yn dechrau rhedeg rhwng Casnewydd a Thref Glynebwy yn ystod cyfnod yr amserlen o ganlyniad i’r buddsoddiad.
Rydyn ni hefyd yn bwriadu rhedeg gwasanaethau yn ystod y dydd bob 45 munud ar reilffordd Wrecsam Canolog i Bidston, cynnydd o bob awr.
Ac mae ailgyflwyno gwasanaethau bob awr rhwng Caer a Lerpwl drwy faes awyr Lerpwl yn newyddion da i gwsmeriaid yng ngogledd ein rhwydwaith, gan ddarparu cyswllt allweddol arall rhwng y ddwy ddinas.
Mae pum deg o drenau newydd sbon bellach wedi ymuno â fflyd Trafnidiaeth Cymru a bydd mwy na 100 yn cael eu cyflwyno ar y prif rwydwaith a’r rhwydwaith Metro dros y ddwy flynedd nesaf.
Bydd gwasanaeth llawn bob awr rhwng Caerdydd a Cheltenham Spa hefyd yn dechrau’r flwyddyn nesaf wrth i ragor o drenau ddod ar gael.
Dylai cwsmeriaid ar holl wasanaethau Trafnidiaeth Cymru daro golwg ar eu hamseroedd teithio gan y gallai eich amser arferol fod yn wahanol.
Dywedodd Colin Lea, Cyfarwyddwr Cynllunio a Pherfformiad TrC: “Rydyn ni’n falch iawn o gyflwyno gwasanaethau newydd ar lwybrau allweddol yng ngogledd a de ein rhwydwaith yn ystod cyfnod yr amserlen hon.
“Roedd prosiect Glynebwy wedi dangos cydweithio gwych gyda’n partneriaid i bron i ddyblu nifer y gwasanaethau ar y rheilffordd, gyda’r cyswllt newydd i Gasnewydd, ac mae’n agor rhagor o gyfleoedd ar gyfer hamdden, dysgu a chymudo.
“Yn Wrecsam a Glannau Dyfrdwy, mae’n rhoi mwy o ddewis a gwell dibynadwyedd ar Lein y Gororau i Bidston, ac mae hi nawr yn bosibl dychwelyd gwasanaethau Lerpwl-Caer yn llawn ar ôl gorffen hyfforddi’r criwiau ar ein trenau newydd.
“Y peth pwysicaf yw cadarnhau manylion eich taith cyn i chi deithio.”
Gall cwsmeriaid weld yr amserlen drwy gynllunio taith YMA
Nodiadau i olygyddion
Mae prosiect Glynebwy yn dilyn benthyciad o £70 miliwn gan Lywodraeth Cymru i Gyngor Bwrdeistref Sirol Blaenau Gwent i ariannu’r gwaith a gyflawnwyd gan Amco Giffen a Siemens ar ran Network Rail.