Rhybudd Tywydd Coch - cyfleusterau hamdden a gwastraff Cyngor Sir Caerfyrddin ar gau ddydd Sadwrn.

Mae Cyngor Sir Caerfyrddin wedi penderfynu cau ei gyfleusterau hamdden yfory, dydd Sadwrn 7 Rhagfyr 2024, yn dilyn y Rhybudd Coch am Wynt gan y Swyddfa Dywydd.

Mae'r Rhybudd Coch mewn grym rhwng 3am ac 11am ddydd Sadwrn, ac mae disgwyl cyfnod o wyntoedd cryf ofnadwy wrth i Storm Darragh symud ar draws Môr Iwerddon. Mae'n bosibl y bydd hyrddiadau o 90 milltir yr awr neu fwy ar fryniau ac arfordir gorllewin a de Cymru.

Gan roi'r pwys mwyaf ar ddiogelwch y cyhoedd, y cyngor a roddir gan Gyngor Sir Caerfyrddin yw peidio â theithio oni bai bod hynny'n gwbl hanfodol. Mae'r Awdurdod Lleol hefyd wedi penderfynu cau i'r cyhoedd y safleoedd canlynol (sy'n cael eu rhedeg gan y Cyngor) drwy'r dydd yfory, dydd Sadwrn 7 Rhagfyr.

• - Canolfannau gwastraff ac ailgylchu y cartref
• - Amgueddfeydd
• - Llyfrgelloedd ac Archifau
• - Orielau
• - Cartref Dylan Tomas
• - Theatrau
• - Parciau Gwledig
• - Canolfannau Hamdden
• - Hwb Bach y Wlad
• - Canolfan Eto
• - Holl Siopau Sionc Nadolig 100% Sir Gâr

Bydd pob safle yn aros ar agor tan yr amser cau arferol heddiw, dydd Gwener 6 Rhagfyr.

Ni fydd trafnidiaeth gyhoeddus bore fory tan 2pm

Hefyd bydd criwiau ac adnoddau ychwanegol wrth gefn gan y Cyngor Sir dros y penwythnos, a fydd yn barod i ymateb i'r amodau wrth iddynt newid.

Dywedodd y Cynghorydd Edward Thomas, yr Aelod Cabinet dros Wasanaethau Trafnidiaeth, Gwastraff a Seilwaith:

“Mae Rhybuddion Coch yn brin iawn a dyna pam rydym ni'n cau ein canolfannau hamdden a gwastraff ddydd Sadwrn.

“Fy neges i drigolion y sir ac i unrhyw ymwelwyr yw peidio â theithio heblaw bod gwir angen, a da chi, cadwch yn ddiogel.”

Sut i roi gwybod am broblemau'r tu allan i oriau

Rhoi gwybod am atgyweiriadau ar gyfer tai Cyngor

Rhowch wybod am waith atgyweirio brys/mawr drwy ffonio 0300 333 2222.

Bydd Delta Wellbeing yn cymryd y galwadau hyn y tu allan i oriau.

Rydym yn disgwyl nifer fawr o alwadau brys dros y penwythnos. Rhowch wybod i ni ar-lein am fân atgyweiriadau.

Cofiwch taw ar gyfer argyfyngau y tu allan i oriau yn unig mae'r uchod, yn ystod oriau gwaith normal dylech ddilyn proses arferol y Cyngor ar gyfer rhoi gwybod am bryderon.

Rhowch wybod am goed sydd wedi cwympo ar wefan y Cyngor Rhoi gwybod am goed sy'n achosi perygl / sydd wedi cwympo

Llifogydd

Gallwch gael diweddariadau o wefan Cyfoeth Naturiol Cymru, sy'n cael ei diweddaru bob 15 munud.

Os ydych yn pryderu am lifogydd ffoniwch y Llinell Llifogydd ar 0345 988 1188.

I gael rhagor o wybodaeth am sut i roi gwybod am broblemau, ewch i wefan Cyngor Sir Caerfyrddin