18 Maw 2025

Ceir datblygiad yn y cynigion i wneud gwelliannau sylweddol i deithio cynaliadwy yng nghanol dinas Casnewydd.

Nodwyd cyfres o welliannau i orsaf drenau Casnewydd, Queensway a chylchfan Old Green yn y cynlluniau ac maent yn cynnwys:

• Cyfnewidfa drafnidiaeth gyhoeddus newydd yng ngorsaf drenau Casnewydd i gysylltu gwasanaethau trên a bws, gan greu canolbwynt ar gyfer teithio cynaliadwy o fewn yr orsaf
• Priffordd ddiwygiedig yn lle cylchfan Old Green, gyda lonydd â blaenoriaeth i fysiau yn ogystal â llwybrau teithio llesol wedi’u symleiddio sy’n fwy cyfleus a deniadol i’r holl ddefnyddwyr
• Cyfleoedd i wella tir y cyhoedd, gan gynnwys yr ardaloedd sy’n amgylchynu Castell Casnewydd. Mae’r cynigion yn cynnwys argymhellion allweddol gan y Comisiwn Trafnidiaeth De-ddwyrain Cymru, a goruchwylir y rhain gan yr Uned Cyflenwi Burns.

Mae’r uned, a arweinir gan Trafnidiaeth Cymru mewn partneriaeth â Llywodraeth Cymru ac awdurdodau lleol Casnewydd, Sir Fynwy a Chaerdydd, yn datblygu rhwydwaith teithio cynaliadwy ar draws de-ddwyrain Cymru.

Cynhaliwyd ymgynghoriad cyhoeddus ar y cynlluniau yng ngwanwyn 2023 a derbyniwyd mwy na 2,400 o ymatebion ynghylch hyn. Cyhoeddwyd crynodeb o’r ymatebion heddiw mewn adroddiad ymgynghori.

Ers i’r ymgynghoriad cau, mae partneriaid yr Uned Cyflenwi Burns wedi bod wrthi’n adolygu’r adborth ac asesu nifer o welliannau arfaethedig i’r cynlluniau gan brofi eu dichonoldeb.

Mae’r Uned Cyflenwi Burns wedi bod yn adolygu rhai elfennau o’r cynlluniau gwreiddiol ar y cyd er mwyn cynnwys yr adborth gwerthfawr a gasglwyd yn ystod yr ymgynghoriad. Mae hyn yn cynnwys sut i drin y murluniau diwylliannol pwysig yn Old Green yn ogystal â newid dyluniai’r cynlluniau i gynnwys sylwadau gan ddarparwyr trafnidiaeth a busnesau sy’n ymwneud ag economi’r nos ar y Stryd Fawr ac o’i hamgylch.

Yn y cyfnod nesaf, byddwn yn parhau i ymgysylltu rhanddeiliaid a phreswylwyr â’r cynlluniau, a sicrhau bod gennym gyllid gan y llywodraeth er mwyn cyflawni’r cynlluniau i wella teithio cynaliadwy.

“Mae Old Green yn rhan annatod o’r rhwydwaith teithio yng Nghasnewydd ac mae’n bwysig ein bod yn gwneud pob dim yn iawn,” dywedodd y Cynghorydd Rhian Howells, sef aelod o’r cabinet Cyngor Dinas Casnewydd ar gyfer seilwaith ac asedau.

“Os bydd y cynigion hyn yn mynd yn eu blaen, byddant yn hwyluso’r gallu i deithio o amgylch Casnewydd a byddant yn cysylltu Castell Casnewydd yn well â chanol y ddinas.”

“Mae’r adborth defnyddiol yr ydyn ni wedi ei dderbyn gan bobl wedi ein galluogi i wella’r cynlluniau er mwyn iddynt gwrdd ag anghenion y bobl yn well.

Dywedodd Prif Swyddog Cynllunio Trafnidiaeth a Datblygu Cymru, Geoff Ogden: “Mae gan y cynigion hyn y potensial i wella teithio yng Nghasnewydd yn sylweddol gan ddarparu cysylltiadau gwell rhwng trenau a bysiau a gwella llwybrau ar gyfer cerdded, olwynio a seiclo. Bydd helpu pobl i deithio yn y ffyrdd hyn yn gwneud Casnewydd yn le gwyrddach a mwy iach.

“Hoffem ddiolch i bawb a wnaeth gymryd yr amser i roi adborth yn yr ymgynghoriad a helpu i lywio’r cynlluniau pwysig hyn er lles y ddinas.”