- Cwcis sydd wir eu hangen
Cwcis sydd wir eu hangen
Mae rhai o’n cwcis yn hanfodol ac ni fydd rhannau o’r safle’n gweithio hebddynt. Mae hyn yn cynnwys cofnodi eich dewisiadau cadw cwcis.
11 Maw 2025
Bydd trenau ychwanegol ar gael i alluogi cefnogwyr pêl droed Cymru i ddychwelyd adref o gêm bwysig i ennill lle yng Nghwpan y Byd y mis hwn.
Bydd Cymru’n chwarae yn erbyn Kazakstan yn ei gêm gyntaf yng ngrŵp J ddydd Sadwrn 22 Mawrth am 19:45 yng Nghaerdydd, gan obeithio ennill lle yn rownd derfynol Cwpan y Byd 2026.
I gefnogi’r digwyddiad, bydd Trafnidiaeth Cymru’n rhedeg trenau ychwanegol rhwng Caerdydd a gogledd Cymru yn ogystal â threnau ychwanegol ar gyfer y gêm rhwng Wrecsam a Stockport yng nghynghrair 1 sydd ar yr un diwrnod.
Yn ffodus i gefnogwyr, mae gwaith peirianneg a gynlluniwyd ar gyfer y penwythnos hwnnw yng ngogledd Cymru bellach wedi’i ail-drefnu.
Roedd Network Rail yn bwriadu cyflawni tri darn o waith rhwng Amwythig a Wrecsam dros y penwythnos hwnnw a oedd yn golygu y byddai teithwyr yn gorfod dod ar lwybr gwahanol i Gaerdydd
Cynlluniwyd y gwaith yn ôl yn 2023 ond ni chadarnhawyd y gemau tan ddechrau’r flwyddyn hon.
Dywedodd Georgie Wills, Rheolwr Cyflenwi Cwsmeriaid a Chynllunio Digwyddiadau Trafnidiaeth Cymru:
“Rydyn ni’n deall pwysigrwydd y digwyddiadau chwaraeon, cerddoriaeth a diwylliannol mawr hyn i’n heconomi.
“Drwy weithio â FAW, rydyn ni’n ymwybodol bod cefnogwyr o ogledd Cymru yn dod i ddibynnu fwyfwy ar ein gwasanaethau er mwyn dod i Gaerdydd ac yn ôl, sy’n dyst o’r gwelliannau rydyn ni wedi eu gwneud dros y 18 mis diwethaf. Unwaith eto felly rydyn ni wedi gallu ychwanegu at ein hamserlen arferol gan roi trenau ychwanegol ar waith i gefnogi’r rheini sydd am deithio adref wedi’r gêm.
“Roedd yr un yma’n fwy heriol oherwydd ni wnaethant gadarnhau’r gemau tan ddechrau’r flwyddyn ac roedd yn bosib y byddai Cymru’n chwarae i ffwrdd.
“Fodd bynnag, mae gennym berthynas gwych â Network Rail ac rwy’n falch iawn ein bod wedi gallu gweithio gyda’n gilydd i ddatrys y sefyllfa.”
Ceir trenau ychwanegol hefyd er mwyn cefnogi gemau Cymru a Wrecsam.
Dywedodd Nick Millington, Cyfarwyddwr Llwybr Cymru a’r Gororau Network Rail,
“Gwnaeth ein partneriaid yn Trafnidiaeth Cymru ofyn inni symud ein gwaith peirianneg oherwydd y nifer sylweddol o gefnogwyr pêl droed Cymru a fyddai eisiau teithio i ogledd Cymru ac yn ôl ar gyfer y gêm yn erbyn Kazakhstan yng Nghaerdydd.
“Bwriadwyd gwneud y gwaith rhwng Amwythig a Wrecsam rhwng bore dydd Sadwrn a bore dydd Llun.
“Fodd bynnag, rydyn ni wedi gallu symud peth ohono i fore dydd Sul rhwng 1am a 9:30am, a’r gweddill i fis Chwefror 2026.
“Nid ydyw bob amser yn bosib symud gwaith o’r fath ond yn yr achos hwn roedden ni wedi gallu ymateb i hyn ac rydyn ni’n hapus i gynorthwyo cynllun TrC o redeg gwasanaethau ychwanegol ar nos Sadwrn a bore dydd Sul.”
Nodiadau i olygyddion
Roedd Network Rail wedi bwriadu gwneud gwaith ar dri safle rhwng Amwythig a Wrecsam rhwng 12:50am ddydd Sadwrn 22 Mawrth a 5:15am ddydd Llun 24 Mawrth. Roedd y gwaith yn cynnwys trawstiau tampio yng Nghroes Newydd, gwaith draenio yn Weston Rhyn, a gwaith ar groesfan rheilffordd Leaton yn Pimhill.
Dyma’r gwasanaethau ychwanegol a fydd yn rhedeg:
Dydd Sadwrn 22 Mawrth
22.20 o Gaerdydd Canolog i Gaer (ychwanegol)
17.17 o Wrecsam Cyffredinol i Gaergybi (gwasanaeth wedi’i ail-amseru a’i atgyfnerthu i gefnogi diwedd y digwyddiad)
17.48 o Wrecsam Cyffredinol i Birmingham New Street (gwasanaeth wedi’i atgyfnerthu i gefnogi diwedd y digwyddiad)
Dydd Sul 23 Mawrth
11.08 o Gaerdydd Canolog i Gaer (ychwanegol). Mae yna wasanaeth cysylltu i arfordir gogledd Cymru.